A Dance of Sparks–107–رقصِ آتش قسط نمبر

ریسٹورنٹ کے دائیں طرف والی سیڑھیوں پر چلے جاؤ۔

  میں نے چلتے چلتے اپنا رخ بدل لیا اور دروازے میں داخل ہوکر سیڑھیوں پراوپر چڑھنے لگا۔ میں نے گانگ کو بھی کار سے اتر تے ہوئے دیکھ لیا تھا۔ وہ شاید کچھ الجھن میں مبتلا ہوگیا تھا کیوکی پروگرام کے مطابق مجھے ریسٹورنٹ میں جانا تھا۔ ریسٹورنٹ کے اوپر ایک میرج بیورو کا دفتر تھا۔جہاں کوشلیا کے علاوہ ایک ادھیڑ عمر تھائی عورت بیٹھی ہوئی تھی۔

 کو شلیاکے  چہرے پر ڈر اور خوف کے تاثرات نمایاں طور پر نظر آرہے تھے۔ تھائی عورت گہری نظروں سے میری طرف دیکھ رہی تھی۔ میں نے  محتاط نظروں سے ادھر ادھر دیکھا اور کو شکیا کے قریب صوفےپربیٹھ گیا۔ اگر یہاں میری موت کا بندوبست کیا گیا تھا تو گانگ اور اس کے ساتھی بھی مجھے نہیں بچا سکتے تھے۔ ان کے آنے سے پہلے ہی  

میرا خاتمہ ہو چکا ہوتا۔

کو شلیا نے اشارہ کیا۔ وہ عورت اٹھ کر دوسرے کمرے میں چلی گئی ۔

ہاں کہو کیا بات ہے؟۔۔۔ میں نے سوالیہ نگاہوں سے کو شلیا کی طرف دیکھا ۔۔۔اس واٹ کے خلاف کیا سازش ہو رہی ہے؟

 پہلے میں مہاراج کی بات سنتا چاہتی ہوں۔ کیا کہا ہے انہوں نے ۔۔۔کو شلیانے کہا۔

اگر تمہاری بات درست نکلی تو مہاراج نہ صرف تمہیں معاف کردیں گے بلکہ تمہاری پہلی پوزیشن بھی بحال کر دی جائے گی اور تمہیں ہر طرح کا تحفظ فراہم کیا جائے گا۔۔۔ میں نے جواب دیا۔

 کوشلیا چند لمحے خاموش رہی اور پھر سرگوشیوں میں اس سازش کے بارے میں بتانے لگی۔ اس کی باتیں سن کر میرا دماغ

گھوم رہا تھا۔

یہ  کب ہو گا؟۔۔۔ میں نے اس کے خاموش ہونے پر پوچھا۔

 ایک ہفتے کے اندر اندر ۔۔۔کو شلیا نے جواب دیا ۔۔۔لیکن مجھ پر اگر انہیں شبہ ہو گیا تو وہ مجھے مار ڈالیں گے۔

تم چند روز کے لیے کہیں روپوش ہو جاؤ۔ ۔۔میں نے کہا۔۔۔ماسٹرہوچن کا فون  نمبر تمہارے پاس ہے۔ ایک ہفتے بعد ان سے رابطہ کرلینا۔ تمہیں صورت حال سے آگاہ کر دیا جائے گا۔

 اس کے تھوڑی ہی دیر بعد میں جب اس دفتر سے باہر نکلا تو کانگ سیڑھیوں  پر ایک اور آدمی کے ساتھ کھڑا باتیں کر رہا تھا۔ میں ان کے قریب سے گزرتا ہوا سیڑھیاں اتر کر باہر آگیا اور گانگ کی کار میں بیٹھ گیا۔ چند سیکنڈ بعد گانگ بھی آگیا۔

ماسٹر ہوچن کے پاس چلو۔۔۔ میں نے کہا۔

 چائنا ٹاؤن میں واقع جمنازیم میں پہنچ کر میں نے ماسٹر ہو چن کوسب کچھ بتا دیا۔ وہ مجھے لے کر فوراً  ہی واٹ ٹریمٹ میں مہاراج وانگ ونگ  پائے کے پاس پہنچ گیا۔ میری بات سننے کے بعد مہاراج کافی دیر خاموش رہے اور پھر کچھ ہدایات دینے کے بعد ہمیں رخصت کر دیا۔ دوسرے دن رات میں چند بھکشوؤں کا اضافہ ہو گیا۔ مجھے سمجھنے  میں دیر نہیں لگی کہ یہ مہاراج کے آدمی تھے جنہیں خاص طورسے یہاں بھیجا گیا تھا۔

اب میں زیادہ تر اس خانقاہ میں گھومتا رہتا تھا۔ ماسٹر ہو چن پہلی مرتبہ مجھے اس پراسرار بوڑھے کے پاس لے کر گیا تھا لیکن اب میں اپنے طور پر گھومتا رہتا۔ تہ خانے اور پراسرار راستے مجھے حیران کیئے دے رہے تھے۔ اگلے روز میں نے ایک ایسا راستہ بھی دریافت کر لیا  جو واٹ کے نیچے ایک نالے سے جا ملتا تھا۔ یہ نالا بہت کشادہ تھا۔ درمیان میں چار پانچ فٹ چوڑی جگہ پر گندہ پانی بہہ رہا تھا۔ اطراف میں پتھروں کا پختہ فرش تھا۔ کہیں خشک تھا اور کہیں کیچڑ تھی۔ واٹ کے اس پراسرار راستے کی سیڑھیاں  نالے کے اندر تک چلی گئی تھیں۔ انہیں باقاعدہ سیڑھیاں نہیں کہا جاسکتا تھا۔ لوہے کے موٹے موٹے سریے نالے کی دیوار  کے ساتھ لگے ہوئے تھے۔ میں ان آہنی سیڑھیوں سے اترکرنالے میں آگیا۔ مجھے یوں لگا جیسے میں کسی بہت بڑی سرنگ میں آگیا ہوں۔ یہ سرنگ اتنی بڑی تھی کہ اس میں ایک بڑا ٹرک آسانی سے چل سکتا تھا۔ دیواروں کے ساتھ اوپر ٹیلی فون اور بجلی کے کیبلز لگے ہوئے تھے۔ آس پاس کے علاقوں کو بجلی اور ٹیلی فون کے کنکشن نالے میں لگے ہوئے انہی کنکشن سے دیے جاتے تھے۔ واٹ میں بھی بجلی اور ٹیلی فون کے کنکشن یہیں سے تھے۔ میں اِدھر اُدھر دیکھ رہا تھا اور پھر اچانک چونک گیا۔ مجھے یہ اندازہ لگانے میں دشواری پیش نہیں آئی کہ یہ سرنگ نما نالا واٹ کے کمپاؤنڈ کے نیچے سے گزر رہا تھا۔ اور اس کمپاؤنڈ میں مہاتما بدھ کا سونے کا وہ مجسمہ نصب تھا جس کے گرد لوہے کا جنگلا لگا ہوا تھا۔ میں تقریباً آدھا گھنٹا اس نالے کا جائزہ لیتا رہا پھر واپس آگیا۔ او روہ راستہ اسی طرح بند کر دیا ۔

وہ کو شلیا سے ملاقات کے بعد پانچواں دن تھا۔ اس وقت شام کے سات بجے تھے۔ واٹ میں زائرین کا رش تھا۔ اچانک ہی شور سن کر میں چونک گیا۔

لو گو۔ دیکھو۔۔۔ ایک آدمی چیختے ہوئے کہہ رہا تھا۔۔۔لا رڈ بُدھا میں زندگی کی حرارت پیدا ہو رہی ہے۔ آؤ۔ دیکھو۔ لارڈ بُدھا کا معجزہ دیکھو۔

 میں تیزی سے آگے بڑھا۔ لوگ لوہے کے جنگلے میں داخل ہو کر مجسمے کو چھو چھو کر دیکھ رہے تھے۔ ان کے چہروں پر عجیب سے تاثرات ابھر آئے تھے۔ عقیدت کے تاثرات میں لوگوں کو ادھر ادھر ہٹاتا ہوا جنگلے میں داخل ہو گیا اور مجسمے کو چھو کر دیکھا۔ اس میں واقعی حرارت پیدا ہو رہی تھی۔ میں جنگلے سے باہر آگیا۔ مہاراج کے بھیجے ہوئے محافظ بھکشو جنگلے کے چاروں طرف پھیل گئے تھے۔ واٹ کے بھکشو مارے عقیدت کے سجدہ ریز ہوئے جا رہے تھے۔

اچانک میرے ذہن میں ایک اور خیال ابھرا۔ میں نے ممی اور ڈیڈی کے ساتھ ایک فلم دیکھی تھی۔ جس میں چور ایک بینک سے سونے کا ذخیرہ لوٹنے کے لیے بینک کے نیچے نالے میں گھس کر بہت ہی عجیب و غریب طریقہ اختیار کرتے ہیں۔

یہ خیال آتے ہی میں نے ایک بھکشو کو ساتھ لیا اور واٹ کے اندر مختلف راہداریوں میں دوڑتا ہوا اس خفیہ راستے کے سامنے پہنچ گیا جو نالے کی طرف کھلتا تھا اور پھر میں نے جیسے ہی وہ راستہ کھولا میرا دل اچھل کر حلق میں آگیا۔

وہ چار آدمی تھے۔ جو ایک جگہ پر کھڑے تھے۔ ان میں ایک ڈرل مشین جیسی کسی مشین سے نالے کی چھت میں سوراخ کر رہا تھا اور اوپر سے سونے کے ٹکڑے ٹوٹ ٹوٹ کر زمین پر بچھی ہوئی ایک چادر پر گر رہے تھے۔ اس آدمی کا چہرہ تو میں نہیں دیکھ سکا لیکن باقی تین آدمیوں کو دیکھ کر میرے دل کی دھڑکن تیز ہو گئی۔ ان میں ایک ٹائیگر تھا۔ دوسرا چی فانگ اور تیسرا رانا۔۔ چی فانگ کے ہاتھ میں آٹو میٹک را ئفل تھی اور ان دونوں کے ہاتھوں میں ریوالور ۔ اب مجھے چوتھے آدمی کے بارے میں بھی اندازہ لگانے میں دشواری پیش نہیں آئی۔ لباس اور قد سے میں نے اسے بھی پہچان لیا تھا۔ وہ شوچائی تھا۔ شوچائی لکڑی کے ایک اسٹول پر کھڑا دونوں ہا تھوں سے کسی ڈرل مشین جیسی وہ مشین چلا رہا تھا۔ مشین کی آواز بہت ہلکی تھی اور پھر آواز بند ہو گئی۔ شوچائی نے سوئچ آف کر دیا تھا۔ اور پھر وہ اسٹول سے اُتر آیا۔ ایسا کرتے ہوئے وہ کچھ گھوم گیا تھا۔ اب اس کا رخ میری طرف تھا اور پھر یکا یک دہ یوں بے حس و حرکت ہو گیا جیسے سانپ سونگھ گیا ہو۔