A Dance of Sparks–110–رقصِ آتش قسط نمبر

اس سارے ہنگامے میں رات آدھی ہو گئی۔ واٹ کو فوری طور پر زائرین کے لیے بند کر دیا گیا تھا اور نالے والی سرنگ میں بھی پولیس کا بھاری پہرا بٹھا دیا گیا تھا۔ ان کے ساتھ مہاراج کے بھی کچھ محافظ تھے۔

مہاراج مجھ سے بہت خوش تھا۔ خوشی مجھے بھی تھی۔ میں ان کے کسی کام تو آیا۔ حق نمک تو ادا کیا۔ مجھے زیادہ خوشی اس بات کی بھی تھی کہ میں نے بدھ کے پیرو کاروں کو گمراہ ہونے سے بچالیا تھا۔ اگر میری ذہانت کام نہ آتی تو وہ لوگ مجسمے کے گرم ہونے کو مہاتما کا معجزہ ہی سمجھتے اور اس طرح نئی نئی بدعتیں پیدا ہو تیں اور شاید یہ انکشاف کبھی نہ ہوتا کہ مجسمہ کھو کھلا ہو چکا ہے اور مہاتما  میں پیدا ہونے والی گرمی چوروں کی پیدا کردہ تھی۔

 رات آدمی سے زیادہ بیت چکی تھی۔ مہاراج اور کئی بڑے بڑے بھکشو واٹ ہی میں تھے۔ البتہ مہاراج نے مجھے جانے کی اجازت دے دی۔ میں خانقاہ والے حصے سے نکل کر رہائشی حصے میں داخل ہوا تو نیم تاریکی میں دو ہیولے دیکھ کر ٹھٹک گیا اور پھر میں نے انہیں پہچان لیا۔ ایک تھائی وانگ تھی اور اس کے ساتھ اس کی نرس۔

تھائی وانگ مجھے دیکھتے ہی دوڑ کر مجھ سے لپٹ گئی۔۔۔ تم نے ہم پر بہت بڑا احسان کیا ہے روحان ۔۔ وہ میری پیشانی پر بوسہ دیتے  ہوئے بولی ۔۔تم شاید اسے کوئی معمولی بات سمجھتے ہوگے لیکن یہ تمہارا بہت بڑا کارنامہ ہے۔ جسے ہماری قوم کبھی نہیں بھولے گی۔ کاش ! میں وہ منظر دیکھ سکتی جب مہاراج اور بنکاک کے بڑے بڑے بھکشو تمہاری پیشانی پر بوسے دے رہے تھے۔

 تو تم وہاں آجاتیں۔۔۔ میں نے کہا۔

 مجھے آنے نہیں دیا گیا۔۔۔ تھائی وانگ نے مایوسانہ لہجے میں جواب دیا ۔۔میں تو کب سے یہاں کھڑی تھی کہ تم آؤ تو تمہیں اس کارنامے پر مبارک باد دوں۔

مبارک باد میں نے وصول کرلی۔ اب کمرے میں چلو۔ اگرتھکن چڑھ گئی تو طبیعت خراب ہو جائے گی۔

 میں اس کا ہاتھ پکڑ کر رہائشی حصے کی طرف چل پڑا۔ نرس  بھی ہمارے ساتھ تھی۔ جب ہم روشنی میں پہنچے تو بہت سے بھکشووں نے مجھے گھیر لیا۔ وہ شاید میرے ہی انتظار میں وہاں کھڑے تھے اور سب بڑی عقیدت مندانہ نظروں سے میری طرف دیکھ رہے تھے۔ دو تین بوڑھے بھکشووں نے آگے بڑھ کر میری پیشانی پر بوسے بھی دیے تھے۔ میں تھائی وانگ والے کمرے ہی میں آگیا تھا۔ وہ نجانے کب سے میرے انتظار میں وہاں کھڑی تھی۔ اس کے چہرے پر تھکن کے

آثار واضح طور پر نظر آرہے تھے۔

 اب تم لیٹ جاؤ۔۔ میں نے کہا ۔۔اگر تمہاری طبیعت خراب ہوگئی تو برا مسلہ  ہو جائے گا۔

میں تم سے سب کچھ تفصیل سے سنتا چاہتی ہوں۔ تم بھی میرے قریب بیٹھ جاؤ۔۔ تھائی وانگ نے بیڈ پر لیٹتے ہوئے کہا۔ میں بیڈ کے قریب ایک کرسی پر بیٹھ گیا۔ نرس بھی ایک طرف کھڑی میری باتیں سن رہی تھی۔ میں انہیں بتا رہا تھا کہ جب بدھ کے مجسمے کے گرم ہونے والا شور مچا تو مجھے اچانک ہی اس فلم کا خیال آگیا تھا جو میں نے بہت عرصہ پہلے ممی  اور ڈیڈی کے ساتھ سنگا پور میں دیکھی تھی۔ چند لمحے خاموش رہنے کے بعد میں انہیں بعد کے واقعات کی تفصیل سنانے لگا۔

جانتے ہو تم نے اس قوم پر کیا احسان کیا ہے ؟۔۔۔ تھائی وانگ نے میرے خاموش ہونے پر کہا اور پھر وہی عقیدت والے خدشے کا اظہار کیا جس کا خیال مجھے بھی آیا تھا کہ اس سے ایک نئی بدعت جاری  ہو جاتی۔ طرح طرح کے شوشے چھوڑے جاتے اور لوگ لارڈ بُدهاکی اصل تعلیمات کو بھول کر ایک نئی راہ پر چل نکلتے جس سے ظاہر ہے انتشارہی کو ہوا ملتی۔

یہی خیال میرے ذہن میں بھی آیا تھا۔۔۔ میں نے جواب دیا۔۔۔  لیکن سونے کی چوری کے انکشاف سے یہ طے ہو گیا کہ وہ کوئی معجزہ نہیں تھا۔

 مجھے ایک اور خیال آرہا ہے۔۔۔ تھائی وانگ نے کہا ۔۔۔ اتفاق سے آج وہ چاروں بیک وقت تمہارے سامنے آگئے۔ صورت حال نہایت سنگین ہونے کے باوجود تم نے بڑی حوصلہ مندی کا ثبوت دیا۔ وہ چی فانگ پر تمہارا پہلا حملہ تھا جسے وہ ہمیشہ یاد رکھے گا لیکن اس کے ساتھ ہی اب تمہیں زیادہ محتاط رہنے کی ضرورت ہے۔

ہاں۔ اب مجھے واقعی محتاط رہنے کی ضرورت ہوگی۔ ۔۔  میں نے کہا

شوچائی ،  رانا اور چی فانگ کے بارے میں تو کچھ نہیں کہہ سکتی۔ انہیں کوئی نہیں جانتا لیکن ٹائیگر کو بنکاک کا بچہ بچہ جانتا اور پہچانتا ہے۔ جہاں تک غنڈا گردی اور بد معاشی کا معاملہ ہے لوگ اس سے ضرور دبتے  ہیں۔ ہر شریف آدمی غنڈوں اور بد معاشوں سے بد کتا ہے لیکن یہ معاملہ مختلف ہے۔ بات مذہب کی ہے۔ کوئی شرابی زانی اور بد کار آدمی بھی لارڈ بدھا کی تو ہین برداشت نہیں کرے گا۔وہ ٹائیگر کو کبھی معاف نہیں کریں گے۔ اس کے جسم کا ریشہ ریشہ کر ڈالیں گے

 کیا تم سمجھتی ہو کہ ٹائیگر کسی کے ہاتھ آسکے گا۔۔۔  میں نے کہا ۔۔۔ اُسے بھی اس بات کا احساس ہو گا کہ اسے شناخت کرلیا گیا ہے۔ روپوش ہو جائے گا اور جب معاملہ ٹھنڈا پڑ جائے گا تو نکل آئے کا اپنی کمین گاہ سے۔۔ میں چند لمحوں کو خاموش ہوا پھر اس کی طرف دیکھتے ہوئے بولا ۔۔۔تھائی وانگ ! بات دراصل یہ ہے کہ اس دنیا کے لوگ، خواہ ان کا تعلق کسی بھی مذہب یا فرقے سے ہوفطرت میں بڑے عجیب ہوتے ہیں۔ بعض اوقات کسی معمولی بات پر اس طرح بھڑک اٹھیں گے کہ قتل وغارت سے بھی باز نہیں آتے اور بعض اوقات بڑی سے بڑی بات بھی ان کے سر پر سے گزر جاتی ہے اور ان کے کانوں پر جوں تک نہیں رینگتی۔ لوگ کسی بات پر اشتعال میں آکر اس طرح بھڑک اٹھتے ہیں جیسے پوری دنیا کو جلا کر راکھ کر ڈالیں گے لیکن جیسے جیسے وقت گزرتا جاتا ہے ان کا جوش و جذبہ ماند پڑ جاتا ہے اور بالآخر وہ اس بات کو بھول جاتے ہیں۔ مذہب ایک ایسا شعبہ ہے جس کی آڑ لے کر لوگوں کو قتل و غارت پر اکسایا جا سکتا ہے۔ میرے خیال میں یہ چوری کی واردات تھی۔ ان کا مقصد سونا حاصل کرنا تھا۔ لارڈ بڈھا کی توہین کا تو انہوں نے کبھی تصور بھی نہیں کیا ہو گا۔ اس میں شبہ نہیں کہ لوگ اسے لارڈ بُدھا کی توہین سمجھیں گے اور کچھ گڑبڑ پھیلانے کی کوشش بھی کریں گے۔ سیاست داں اور شرپسند لوگ اس موقع سے فائدہ بھی اٹھائیں گے لیکن میرا خیال ہے کہ مہاراج اور بنکاک کی دوسری خانقاہوں کے بڑے بڑے راہب اس آگ کو زیادہ نہیں بھڑکنے دیں گے۔ میں نے ان کی باتیں سنی ہیں۔ صورت حال کا جائزہ لینے کے بعد وہ بھی اس نتیجے پر پہنچتے ہیں کہ یہ ایک محض چوری کی واردات تھی اور اس سے قانونی طریقوں سے ہی نمٹا جائے گا۔

 وہ لوگوں کے بھڑ کے ہوئے جذبات کے آگے کیسے بند باندھ سکیں گے؟۔۔۔ تھائی وانگ نے کہا

وہ سمجھ دار لوگ ہیں۔ روحانی پیشوا ہیں۔ لارڈ بدھا کی تعلیمات کا پرچار کرتے ہیں۔ لوگ ان کی بہت سی باتیں مانتے ہیں۔ شاید یہ بات بھی مان لیں۔ ۔۔میں نے کہا۔

تو گویا تمہارے خیال میں اس معاملے کو مذہبی ایشو نہیں بنانا چا ہیے ۔۔۔ تھائی وانگ نے میرے چہرے پر نظریں جماتے ہوئے کہا۔