A Dance of Sparks–101–رقصِ آتش قسط نمبر

میں اس کے بیڈ پر نیم دراز ہو گیا اور تکیہ اٹھا کر سر کے نیچے رکھ لیا۔ اس کے ساتھ ہی میں چونک گیا۔ تکیے کے نیچے پلاسٹک کی دو پُڑیاں  رکھی ہوئی تھیں جن میں سفید رنگ کا کوئی پاؤڈر تھا۔ ایک پڑیا  کھلی ہوئی تھی اور دوسری بند تھی۔ اس میں پاؤڈر کی مقدار دو گرام سے زیادہ نہیں ہوگی۔ میں نے کھلی پڑیا وہیں رہنے دی اور پیک شدہ پڑیا اٹھا کر جیب میں ڈال لی۔ تکیے کو اس کی جگہ پر رکھا اور اٹھ کر کرسی پر بیٹھ گیا۔ میرا خیال تھاوہ کوئی دوا تھی جو تھائی وانگ استعمال کر رہی تھی لیکن اس نے مجھ سے ذکر تک نہیں کیا تھا کہ وہ کوئی دوا استعمال کر رہی ہے۔

اچانک میرے ذہن میں ایک اور خیال ابھرا۔ میں نے ہیروئن کبھی دیکھی نہیں تھی صرف نام سنا تھا۔ جنگل والے کیمپ میں بھکشوؤس سے یہ بھی سنا تھا کہ ہیروئن کا نشہ بڑا خوفناک ہوتا ہے۔ یہ اچھے بھلے صحت مند آدمی کو چند روز کے اندر اندر نچوڑ کر رکھ لیتی ہے۔ نشہ باز کو ہیروئن نہ ملے تو وہ مردوں کی طرح پڑا رہتا ہے۔ بھوک نہیں لگتی۔ جسم ٹوٹنے لگتا ہے اور وہ اپنے آپ کو نوچنے لگتا ہے۔

 میرا دماغ چکرانے لگا۔ کئی روز سے میں تھائی وانگ کو اسی کیفیت میں دیکھ رہا تھا۔ کھانے سے اسے کوئی رغبت نہیں رہی تھی۔ اسے میں نے اکثر مردوں کی طرح پڑے دیکھا تھا۔ اس کے گال پچک گئے تھے۔ آنکھیں اندر کو دھنستی جارہی تھیں۔ ایک روز پہلے میں نے اسے اپنی انگلیاں چباتے اور اپنے آپ کو نوچتے ہوئے دیکھا تھا اور پھر شام کے بعد جب وہ باہر کا چکر لگا کر آئی تھی تو اس کے ایک گھنٹے بعد وہ بڑی حد تک نارمل نظر آئی تھی۔ میرے دماغ میں آندھیاں سی چل رہی تھیں۔ کیا تھائی وانگ ہیروئن استعمال کرنے لگی تھی۔ اسے یہ ہیروئن کون لا کر دیتا تھا۔ کوئی بات میری سمجھ میں نہیں آرہی تھی۔ چند سیکنڈ بعد ہی میں اٹھ کر اپنے کمرے میں آگیا۔

تھائی وانگ سے میری ملاقات اس کے تقریباً ایک گھنٹے بعد ہوئی تھی۔ میں نے ظاہر ہی نہیں کیا کہ اس کے کمرے میں گیا تھا اور پھر اس روز میں نے ایک بوڑھے بھکشو کو الگ لے جا کر وہ پڑیا دکھائی تو یہ تصدیق ہو گئی کہ یہ ہیروئن ہی تھی۔

یہ تصدیق ہو جانے کے بعد میں اپنے جسم پر چیونٹیاں سی رینگتی ہوئی محسوس کرنے لگا۔ تھائی وانگ کو یہ عادت کیسے لگی تھی اور وہ ہیروئن کہاں سے لیتی تھی،  پھر میرے ذہن میں اچانک ہی ایک خیال ابھرا۔ وہ روزانہ شام کو خانقاہ کی طرف جاتی تھی۔ شاید اسی طرف وہ کسی سے ہیروئن لیتی تھی۔

شام کے بعد میں تھائی وانگ کے کمرے میں گیا تو عجیب صورت حال نظر آئی۔ کمرے کی ہر چیز بکھری ہوئی نظر آئی۔ بستر الٹا ہوا تھا۔ تکیے کا غلاف بھی الگ پڑا تھا۔

کیا ہوا۔ یہ کیا کر رہی ہو۔ کچھ کھو گیا ہے کیا ؟۔۔۔ میں نے ادھراُدھر دیکھتے ہوئے پوچھا۔

اوہہہہ ۔۔ نہیں۔۔کک۔ کچھ نہیں ۔۔۔ وہ گڑ بڑا سی گئی۔

تو پھر یہ سب کیا ہے؟۔۔۔ میں نے بکھری ہوئی چیزوں کی طرف اشارہ کیا۔

اوہ ۔۔ کچھ نہیں۔ ایسے ہی ۔۔ پتا نہیں مجھے کیا ہو گیا ہے۔۔۔ وہ چیزیں اٹھا کر ادھر ادھر پھینکنے لگی۔

 میں اسے پکڑ کر باہر لے آیا۔ میرا خیال تھا تازہ ہوا میں اس کی کیفیت کچھ سنبھل جائے گی لیکن اس کی بے چینی بڑھتی گئی۔ دوسرے روز شام کو وہ خانقاہ کی طرف گئی تو میں نے اسی بوڑھے بھکشو کو اشارہ کیا۔ وہ بھی اٹھ کر تھائی وانگ کے پیچھے چل پڑا۔ تھائی وانگ آدھے گھنٹے بعد واپس آئی اور ادھر اُدھر دیکھے بغیر اپنے کمرے کی طرف چلی گئی۔ اس کے تھوڑی ہی دیر بعد وہ بوڑھا بھکشو بھی واپس آگیا۔

تھنگ چو۔۔۔ اس نے میرے کان میں سرگوشی کی ۔۔۔وہ گیٹ کے جنگلے کے ساتھ کھڑا ہے۔ اس کے پاس کچھ اور لوگ بھی آرہے ہیں۔ تھائی وانگ نے اس سے کوئی چیز لی تھی جسے وہ اپنے لباس میں چھپا کرواپس آگئی۔

 میں اچھل پڑا ۔ تھنگ چو وہی بھکشو تھا جسے میں نے جنگل والے کیمپ کے مقابلے میں ناک آؤٹ کر دیا تھا۔ میں تو اسی رات مہاراج کے ساتھ کیمپ سے واپس آگیا تھا اور بعد میں پتا چلا تھا کہ دوسرے روز تھنگ چونے بھی طبیعت خراب ہونے کا بہانہ کر کے کیمپ چھوڑ دیا تھا۔ اس کے دو تین روز بعد میں نے اسے ایک مرتبہ اس خانقاہ میں بھی دیکھا تھا۔

وہ بڑا کینہ پرور اور کمینہ آدمی ہے۔۔۔ بوڑھا بھکشو کہہ رہا تھا ۔۔۔ مجھے یاد ہے۔ اسے کم از کم دو مرتبہ مہاراج سے سزا بھی مل چکی ہے۔ سنا ہے تم نے کیمپ میں اسے بڑی عبرت ناک شکست دی تھی۔ تھائی وانگ بھی تو وہاں تھی۔ ہو سکتا ہے یہ عادت اسے وہیں سے پڑی ہو۔

نہیں۔۔۔ میں نے نفی میں سرہلایا۔۔۔ میں سمجھ گیا معاملہ کیا ہے۔ اب تم ایک اور کام کرو۔ تم ابھی اور اسی وقت ماسٹر ہو چن کے پاس چلے جاؤ اور اس سے کہو کہ میں فوری طور پر اس سے ملنا چاہتا ہوں اور ایک بات ذہن میں رکھنا۔ کسی کو اس بات کا پتا نہ چلے ۔

بھکشو چند لمحے میری طرف دیکھتا رہا پھر خاموشی سے اٹھ کر چلا گیا۔

میرا دماغ گھوم رہا تھا۔ تھنگ چو واقعی بہت کمینہ اور کینہ پرور ثابت ہوا تھا۔ وہ اپنی شکست کو نہیں بھولا تھا۔ میں تو اس مقابلے کو کھیل ہی سمجھا تھا لیکن اس نے مقابلے کے دوران میں بھی کچھ اس طرح سے مجھ پر حملے کیے تھے جیسے حقیقی لڑائی لڑ رہا ہو اور مجھے ہر قیمت پر شکست دینا چاہتا ہو اور جب میرے ہاتھوں ناک آؤٹ ہوا تو اسے اپنی توہین سمجھا۔ اس نے دوسرے ہی روز کیمپ چھوڑ دیا ۔ وہ شاید مجھ سے بدلہ لینے کے لیے موقع کی تاک میں تھا۔ مجھ پر وار کرنے کا تو موقع نہیں مل سکا البتہ تھائی وانگ اس کے ہتھے چڑھ گئی۔ اس نے تھائی وانگ کو ہیروئن کا عادی بنا دیا۔ اس طرح وہ مجھ سے اپنی شکست کا بدلہ لینا چاہتا تھا۔

میں ذہنی طور پر اس قدر اپ سیٹ ہو چکا تھا کہ میں نے کلاس وہیں پرختم  کردی اور اپنے کمرے کی طرف آگیا۔ تھائی وانگ کے کمرے کے سامنے سے گزرتے ہوئے میں رک گیا۔ دروازہ بند تھا اور اندر بتی جل رہی تھی۔ یہ دوپٹ کا دروازہ تھا۔ تختوں میں بہت معمولی سی جھری تھی۔ میں نے جھانک کر دیکھا تو کانپ اٹھا۔ تھائی وانگ بیڈ پر مردوں کی طرح پڑی ہوئی تھی۔ اس کے دونوں بازو اطراف میں پھیلے ہوئے تھے۔ سانس تیز ہونے کی وجہ سے اس کے سینے کا زیر و بم دور سے ہی نظر آرہا تھا۔ بیڈ کے قریب چھوٹی میز پر چاندی جیسے کاغذ کا ایک ٹکڑا پلاسٹک کی اسٹرا جیسی ایک نلکی ماچس اور سفید پلاسٹک کی ایک پڑیا بڑی ہوئی تھی۔

میں نے دروازے کو دھکا دیا۔ اندر سے کنڈا لگا ہوا تھا۔ میں  نے دستک دینے کے ساتھ ہی جھری سے آنکھ لگا دی۔ تھائی وانگ  بمشکل بیڈ سے اٹھی۔ اس نے پلاسٹک والی پریا اٹھا کر تکئے کے نیچے چھپا دی۔ دوسری چیزیں بیڈ کے نیچے پھینک دیں اور دروازہ کھول کر دوبارہ بیڈ پر جا گری۔