A Dance of Sparks–79–رقصِ آتش قسط نمبر

اس کے ساتھ ہی میرے منہ سے گہرا سانس نکل گیا۔ وہ کسی جھاڑی کی لچک دار شاخ تھی جو نجانے کہاں سے پانی بہتی ہوئی آرہی تھی اور تھائی وانگ کی گردن سے لپٹ گئی۔

سانپ نہیں۔جھاڑی تھی۔ ۔۔ میں نے کہتے ہوئے وہ جھاڑی پانی  میں پھینک دی اور پھر پل پر قدموں کی آواز سن کر چونک گیا۔

خا موش رہنا۔ کوئی آرہا ہے۔ ۔۔ میں نے سرگوشی کی۔

پل  کے تختوں پر قدموں کی آواز سنائی دے رہی تھی۔ وہ ایک عورت اور ایک مرد تھا ، جو دوسری طرف سے آئے تھے اور باتیں کرتے ہوئے پل پر سے گزر گئے ۔

ہ لوگ ہمیں بنگلوں کی طرف ڈھونڈ رہے ہیں۔۔۔ تھائی وانگ  نے سرگوشی کی۔۔۔ اور اب میرا خیال ہے کہ ہمیں یہاں سے نکل جانا چاہئے۔

میں نے تھائی وانگ کو چھوڑ دیا اور آہستہ آہستہ کنارے کے ساتھ حرکت کرتا ہوا پل سے باہر جھانکنے لگا۔ بنگلوں کی طرف سے زور ،زور  کی آوازیں سنائی دے رہی تھیں۔ وہ لوگ غالباً زبر دستی بنگلوں میں گھس کر  ہمیں تلاش کر رہے تھے۔ وہ یقینا یہی سمجھ رہے ہوں کر اپنے بنگلے سے بھاگ کر ہم نے کسی اور بنگلے میں پناہ لے رکھی ہے۔  میں مختاط نظروں سے ادھر ادھر دیکھتا ہوا بڑی آہستگی سے نہرسے نکل آیا اور تھائی وانگ کو بھی باہر کھینچ لیا۔ کپڑوں سے پانی نچڑ رہا تھا۔

 میں اس وقت عجیب سی کیفیت میں مبتلا تھا۔ یہ سب کچھ میری وجہ سے ہو رہا تھا۔ اب تک نجانے کتنے لوگ  مارے جاچکے تھے۔ ماسٹر پھو کا حشر میں نے اپنی آنکھوں سے دیکھا تھا،  اور اب انہوں نے تھائی وانگ کا بھی سراغ لگا لیا تھا جس نے مجھے پناہ دے رکھی تھی۔ اگر ہم دونوں بنگلے میں ان کے ہاتھ آجاتے تو نجانے ہمارا کیا انجام ہوتا۔

اگر چہ اصل ٹارگٹ میں تھا لیکن نجانے میرے ذہن میں تھائی وانگ  کیوں سما گئی تھی کہ مجھے تھائی وانگ کی حفاظت کرنی چاہے جو   میرے لیے اس مصیبت میں پھنسی تھی اور اس کی حفاظت کی زمہ داری  بھی اب مجھ پر ہی عائد ہوتی تھی۔  اور پھر میں نے غیر رادی طور پر اس کا ہاتھ پکڑ لیا اور ہم پل پار کر کے دوسری طرف آگئے۔  

دوسری طرف ایک تنگ سی سڑک تھی جو آگے جا کر چاروئے نا کھن روڈ سے جاملتی تھی۔ کپڑوں سے ابھی تک پانی دھار کی صورت میں بہہ رہا تھا۔ ہم چند گزہی  چلے  تھے کہ تقریباً پچاس گز آگے والے موڑ سے ایک موٹر سائیکل اس طرف مڑتی ہوئی نظر آئی۔ اس موٹر سائیکل کو دیکھ کر میرے ذہن میں اچانک ہی ایک خیال ابھرا۔ میں نے تھائی وانگ کی طرف دیکھا۔ اس کے ذہن میں بھی غالباً کوئی ایسی ہی بات آئی تھی۔ اس نے مجھے اشارہ کیا اور میں بڑی پھرتی سے سڑک سے ہٹ کر جھاڑیوں میں دبک گیا۔

تھائی وانگ سڑک کے بیچ میں کھڑی ہو گئی۔ اس نے پستول کا ہاتھ پشت پر رکھ لیا اور دوسرے ہاتھ سے موٹر سائیکل کو رکنے کا اشارہ کرنے لگی۔ موٹر سائیکل اس کے قریب پہنچ کر رک گئی۔ تھائی وانگ  نے بڑی پھرتی سے موٹر سائیکل سوار پر پستول تان لیا۔

اگر اپنی زندگی چاہتے ہو تو بائیک اسٹینڈ پر کھڑی کرکے خاموشی سے اس طرف دوڑ لگا دو۔ اگر تمہارے منہ سے کوئی آواز نکلی تو گولی ماردوں گی۔

موٹر سائیکل سوار و بلا پتلا سا ادھیڑ عمر آدمی تھا۔ پستول دیکھ کر وہ تھر تھر کانپنے لگا۔ اس نے نیچے اتر کر موٹر سائیکل اسٹینڈ  پر کھڑی کردی اور منہ سے آواز نکالے بغیر جھاڑیوں میں دوڑتا چلا گیا۔ میں جھاڑیوں سے نکل کر سڑک پر آگیا۔ تھائی وانگ نے پستول پاجامے کی جیب میں ٹھونس لیا اور موٹر سائیکل پر بیٹھ کرکک لگانے لگی۔

میں اس دوران میں پچھلی سیٹ پر بیٹھ چکا تھا اور پھر مجھے ایک غیر متوقع صورت حال کا سامنا کرنا پڑا۔ فضا اچانک ہی روشن ہو گئی تھی۔ میں نے چونک کر دیکھا تو کانپ کر رہ گیا۔ نہر کے دوسری طرف تھائی وانگ کی کوٹھی سے شعلے بلند ہو رہے تھے۔ غالباً پیٹرول چھڑک کر آگ لگا دی گئی تھی۔ تھائی وانگ ایک لمحے کو سکتے کی سی کیفیت میں بے حس و حرکت موٹر سائیکل پر بیٹھی رہی پھر وہ موٹر سائیکل سے اتر گئی اور جیب سےپستول نکال لیا۔

میں ۔۔میں انہیں زندہ نہیں چھوڑوں گی۔ ایک ایک کو ختم کردوں گی۔ ۔۔ اس کے منہ سے خوفناک غراہٹ نکلی۔

 میں چونک گیا اور دوسرے ہی لمحے میں بھی سیٹ سے اتر گیا۔ موٹر سائیکل دوسری طرف الٹ گئی۔ تھائی وانگ پل کی طرف دوڑ رہی تھی۔ میں نے لپک کر اسے پکڑ لیا۔

کہاں جا رہی ہو۔ تمہارا دماغ تو خراب نہیں ہو گیا؟۔۔۔ میں اسے روکنے کی کوشش کرنے لگا۔

انہوں نے میرا گھر جلا دیا ۔۔۔۔ سب کچھ راکھ کر ڈالا۔ میں ان سب کو ختم کردوں گی۔  وہ چیخی۔

پاگل مت بنو تھائی وانگ ہوش کے ناخن لو۔۔۔  میں نے بھی چیخ کر کہا ۔۔۔ وہ تمہیں دیکھتے ہی گولیوں سے بھون دیں گے۔ یا تمہیں اٹھا کر جلتی ہوئی آگ میں پھینک دیں گے۔

 تھائی دانگ چیختے  ہوئے اپنے آپ کو میری گرفت سے چھڑانے کی کوشش کرتی رہی۔ اپنا بنگلا آگ کے شعلوں کی لپیٹ میں دیکھ کر اس پر جنون کی سی کیفیت طاری ہو گئی تھی۔ میں نے اس کے منہ پر ایک زوردار تھپڑ رسید کر دیا۔ وہ لڑکھڑا کر رہ گئی۔

پاگل مت بنو۔۔۔ میں نے کہا ۔۔۔اس وقت اس طرف جانا خود کشی کے مترادف ہے ہم ان کا کچھ نہیں بگاڑ سکیں گے۔ البتہ وہ ہم دونوں کو ہلاک کر دیں گے۔ عقل مندی کا تقاضا یہی ہے کہ ہم یہاں سے نکل جائیں۔ تمہارے گھر کی بربادی کا بدلہ ہم ان سے ضرور لیں گے۔ ہم زندہ رہے تو ایسے کئی مواقع ملیں گے۔ اس وقت یہاں سے نکلو۔

تھائی وانگ و حشت آمیز نظروں سے میری طرف دیکھ رہی تھی۔ زور دار تھپڑ کھانے کے بعد میری بات شاید اس کی سمجھ میں آگئی تھی۔

اب یہاں کھڑے کھڑے وقت ضائع مت کرو۔ کچھ لوگ اس طرف آرہے ہیں۔ جلدی کرو۔۔۔ میں نے کہا۔

 تین چار آدمی بنگلوں کے ساتھ نہر کے کچے راستے پر دوڑتے ہوئے مل کے طرف آرہے تھے۔ تھائی وانگ نے پستول پھر جیب میں ڈال لیا اور موٹر سائیکل سیدھی کی اور کک لگا کر اسے اسٹارٹ کر دیا۔ میں پچھلی سیٹ پر بیٹھ گیا۔ اس نے گیئر میں ڈال کر موٹر سائیکل کو واپس موڑا اور اس کی رفتار بڑھاتی چلی گئی۔ میں نے پیچھے مڑ کر دیکھا۔ بنگلے سے اٹھنے والے شعلے اب آسمان سے باتیں کر رہے تھے اور لوگوں کے شور کی آوازیں بھی سنائی دے رہی تھیں۔

تھائی وانگ موٹر سائیکل چلانے میں بڑی ماہر ثابت ہوئی تھی۔ رفتار بہت تیز تھی۔ میں پچھلی سیٹ پر بیٹھا اس کے ساتھ چپکا ہوا تھا۔ دونوں ہا تھ اس کی بغلوں سے نکال کر اس کے سینے پر لیٹ رکھے تھے۔ میرے کندھے پر لٹکا ہوا بیگ کبھی ایک طرف جھول جاتا اور کبھی دوسری طرف چاروئے ناکھن روڈ تک پہنچنے میں چند منٹ سے زیادہ نہیں لگے تھے۔ وہاں سے اس نے موٹر سائیکل کرونگ تصیب برج کی طرف موڑلی۔ دریا کے پل پر اس وقت ٹریفک زیادہ تھا لیکن تھائی وانگ بڑی مہارت سے موٹر سائیکل کو گاڑیوں کے بیچ سے گھماتی ہوئی نکال رہی تھی۔