smuggler–21–سمگلر قسط نمبر

تھیلے میں ہزار پانچ سو اور سو روپے والے نوٹ بھرے ہوئے تھے۔ ان نوٹوں کے نیچے سفید پوڈر کی تھیلیاں بھری ہوئی تھیں۔ میں نے ایک بار پھر ادھر ادھر دیکھا۔ تھیلے کو گرہ لگائی اور سٹریپ کو کلائی پر لپیٹ کر تھیلے کو گود میں رکھ لیا۔ غیر متوقع طور پر اتنی دولت ہاتھ آگئی تھی اور اب تو میرے سونے کا سوال ہی پیدا نہیں ہوتاتھا۔

میں نہیں سمجھ سکا تھا کہ سیٹھ نے وہ تھیلا میرے حوالے کیوں کیا تھا۔ بہت سوچنے کے بعد ایک ہی بات ذہن میں آئی ۔ وہ تھیلا کسی اور کو دینا چاہتا ہو گا لیکن بدحواسی اور جلد بازی میں میرے حوالے کر دیا۔  یا اسے مجھ پر اتنا اعتماد تھا کہ اس نے تھیلا مجھے دے کر صبح نو بجے بھاٹی چوک پر بھیجے پہلوان کے ہوٹل ملنے کو کہا تھا۔

اس کا خیال تھا کہ شاید میں رقم اور ہیروئن کی تھیلیوں سے بھرا ہوا یہ تھیلا لے کر صبح پھجے کے ہوٹل پر پہنچ جاؤں گا۔ اس نے واقعی یہ سوچا تھا تو وہ دنیا کا سب سے بڑ احمق تھا۔ اتنی بڑی رقم کا تو میں نے کبھی سوچا بھی نہیں تھا۔ اتفاق سے یہ رقم میرے ہاتھ آگئی تھی اور میں اب اتنا احمق نہیں تھا کہ یہ رقم اس کے حوالے کر دیتا۔

مجھے یہ بھی علم تھا کہ صبح جب میں پھجے کے ہوٹل پر نہیں پہنچوں گا تو میری تلاش شروع ہو جائے گی۔ وہ شہر کا چھپہ چھپہ چھان ماریں گے۔ میرے لیے محفوظ ترین جگہ یہ دربار ہی تھا۔

میں تقریباً ایک ہفتہ میراں صاحب کے دربار میں پڑا رہا۔ روزانہ ہزاروں کی تعداد میں عقیدت دربار میں حاضری دینے کیلئے آتے۔ لنگر بھی بنٹتے خیرات بھی ملتی۔  مجھے کسی سے ایک جوڑا کپڑے بھی مل گئے تھے۔ میں جب یہاں آیا تھا تو میرے جسم پر میلی سی پینٹ شرٹ تھی۔ اب شلوار قمیں بے تحاشا بڑھے ہوئے شیو سے میرا حلیہ بھی بدل گیا تھا۔ میں نے بچوں کے سکول بیگ کی طرح کا ایک بیگ بھی خرید لیا تھا۔ نوٹوں اور ہیروئن سے بھرا ہوا تھیلا اس میں ڈال کر میں بیگ کو ہر وقت کندھے پر لٹکائے رکھتا۔ کوئی بھی نہیں سوچ سکتا تھا کہ میرے اس بیگ میں لاکھوں روپے مالیت کی ہیروئن اور لاکھوں کی نقد رقم موجود ہوگی۔ اتنی رقم پاس ہونے کے باوجود میں خیرات میں ملا ہوا کھانا کھاتا۔

دو دن اور وہاں رہ کر میں دس دن بعد دربار سے نکلا میرا دل بری طرح دھڑک رہا تھا۔ اگر پہچان لیا گیا تو وہ لوگ میری ہڈیوں کا سورمہ بنادیں گے۔ میں صرف سیٹھ احسان اور ہوٹل کے تین چار ملازموں کوپہچانتا تھا۔ نجانے کتنے لوگ میری تلاش میں ہوں گے۔ دل کو دھڑ کا سالگا ہوا تھا جیسے کوئی اچانک ہی مجھے گرفت میں لے لے گا۔ ایک تانگے والے  سے ذرا  کچھ  گہری گپ شپ ہو گئی اور پھر اسی کے توسط سے  مجھے باغبانپورکے قریب بھوگی وال کے گنجان آباد علاقے میں ایک کھولی کرائے پر مل گئی۔ صرف ڈیڑھ سوروپے مہینے کرایہ تھا اور مجھ سے دو مہینے کا کرایہ ایڈوانس لیا گیا تھا۔  یہ مکان بالکل کھنڈر بن چکا تھا۔ صرف یہی ایک کمرہ قابل استعمال تھا جو مجھے دے دیا گیا ۔ کھنڈر میں ایک طرف بغیر چھت کا غسل خانہ بھی تھا جس کے سامنے  پھٹا ہوا پردہ لٹکا ہوا تھا۔ ٹانگے والے سے میری دوستی گہری ہوگئی جب وہ تانگہ بند کرتا تو میرے پاس آ کر بیٹھ جاتا اس کھولی میں رہتے ہوئے میں نے بتدریج اپنا  حلیہ تبدیل کرنا شروع کر دیا۔

 بے تحاشا بڑھی ہوئی شیو کو بنوا کر باقاعدہ داڑھی کی صورت دی۔ آنکھوں میں بھوری شیڈ والے کونٹیکٹ لینز لگوا لیے  اور پینٹ شرٹ بھی پہننا شروع کر دی۔ صرف بیس دن بعد میں نے باغبانپورہ میں ڈھنگ کا ایک مکان کرائے پہ لیا اور وہاں منتقل ہو گیا۔  تانگے والا وہاں بھی میرے پاس آتا رہا۔ پہلے میں نے سوچا تھا کہ بھیس بدل کر شہر سے با ہر نکل جاؤں گا لیکن پھر بھاگنے کا خیال ذہن سے جھٹک کر لاہور ہی میں رہنے کا فیصلہ کر لیا۔ قصور میں شہزاد نے مجھے سمگلنگ کے دھندے میں دھکیلنے کی کوشش کی تھی تو مجھے اس پر غصہ آیا تھا لیکن اب یہ بات میری سمجھ میں آ رہی تھی کہ جیب خالی ہو تو انسان کو کتے سے بھی زیادہ حقیر سمجھا جاتا ہے۔ پیسہ جیب میں ہو تو سب ہی جھک کر سلام کرتے ہیں۔ میرے جیسا میٹرک پاس نو جوان جس کا کوئی فیملی بیک گراؤنڈ نہ ہو اسے تو سرکاری محکمہ میں کلر کی بھی نہیں ملتی۔ میرے پاس دولت آگئی تھی۔ اسے میں سنبھال کر خرچ کرتا تو دو چار سال آرام سے گزار سکتا تھا لیکن کب تک۔۔۔۔

میں نے سیٹھ احسان کو دیکھ لیا تھا کہ کسی طرح وہ بیٹھے بیٹھے روزانہ لاکھوں روپے کما رہا تھا۔ اس طرح راتوں رات دولت مند بننے کا راز مجھے بھی معلوم ہو گیا تھا اور مجھےبھی سٹینڈ مل رہا تھا۔

تھیلے میں ملنے والی رقم ساڑھے سات لاکھ روپے تھے اور اتنی ہی مالیت کی ہیروئن بھی تھی۔ ایک اچھا سٹارٹ مل سکتا تھا۔ میں کئی روز تک  تانگے والے کا جائزہ لیتا رہا۔ میرے خیال میں وہ قابل اعتماد ساتھی بن سکتا تھا۔ اسے اعتماد میں لینے کے بعد آخر کار ایک روز میں نے اس سے ہیروئن کی بات کر ہی ڈالی۔

اور اس طرح میرا ہیروئن کا بزنس شروع ہو گیا۔ میرا ضمیر مجھے ملامت کرتا رہا۔ کچو کے لگاتا  رہا۔ میں اپنے ضمیر کو تھپکیاں دے کر سلانے کی کوشش کرتا رہا۔ بعض اوقات اسے ڈانٹ بھی دیتا ۔ کم بخت تو اس  وقت کہاں مر گیا تھا جب شہزاد کی جوان اور حسین بیوی کے ساتھ اپنی راتوں کو رنگین بنایا کرتا تھا، ضمیر کی اس جنگ کے دوران میں دولت بٹورتا رہا۔

میرا مقابلہ سیٹھ احسان کے گروہ سے تھا۔ اس گروہ میں بڑے بڑے جغادری قسم کے لوگ شامل تھے۔ مجھے بھی کچھ قابل اعتماد اور اچھے آدمی مل گئے تھے۔ شہر میں اور بھی کئی گروہ یہ گھناؤنا دھندا کرر ہے تھے لیکن سیٹھ احسان کے گروہ سے تو گویا میری ٹھن گئی تھی۔ سیٹھ احسان کو بھی پتہ چل گیا کہ میں کون ہوں اور پھر وہ کھل کر سامنے آ گیا۔ اس طرح ہماری گینگ وار شروع ہوگئی۔ جہاں جس کا داؤ چلتا  وار کر گزرتا۔ اس گینگ وار میں اب تک میرا ایک اور سیٹھ احسان کے دو آدمی مارے جا چکے تھے۔ اور پھر نجانے کس طرح سیٹھ احسان کو یہ پتہ چل گیا کہ عمران عرف مانی  یعنی میں قصور پولیس کو قتل کے جرم میں مطلوب ہوں۔ بات لاہور پولیس تک پہنچ گئی۔ پولیس نےیہ بھی معلوم کر لیا کہ ڈیڑھ سال پہلے اکبری دروازے کے قریب گندے نالے سے جو لاش ملی تھی اس کا قاتل بھی میں ہی ہوں۔ میرے گرد پولیس کا گھیرا تنگ ہوتا رہا۔ میں روپیہ پانی کی طرح بہا رہا تھا۔ میرے ساتھی بھی میرا ساتھ چھوڑتے جا رہے تھے۔ میں بالکل تنہا رہ گیا تھا اور پھر ایک رات پولیس نے میرے مکان کو گھیرے میں لے لیا۔ میں بڑی مشکل سے وہاں سے جان بچا کر بھاگ سکا تھا۔