Smuggler–53–سمگلر قسط نمبر

کار کا انجن اچانک ہی ہچکولے کھانے لگا۔ میں نے گیئر بدل بدل کر اس کا ردھم برقرار رکھنے کی کوشش کی۔مگر کامیاب نہ ہو سکا اور پھر فیول بتانے والے ڈائل پر نظر پڑتے ہی میرے منہ سے گہرا سانس نکل گیا۔ پٹرول ختم ہو چکا تھا۔ میں نے کار روک لی اور اپنے زخمی بازو کو دیکھنے لگا۔ خون کے قطرے ٹپک رہے تھے۔ میں نے جس کپڑے سے پٹی باندھی تھی وہ بہت ہی غلیظ اور گندہ تھا۔ وہ کپڑا دراصل میں نے اندھیری گلی میں چلتے ہوئے زمین سے اٹھایاتھا اگر روشنی میں اس کپڑے کو دیکھا ہوتا تو اسے چھونا بھی پسند نہ کرتا ۔

کار کے ڈیش بورڈ والے خانے میں پیلے رنگ کا فلالین کا ایک ڈسٹر رکھا ہوا تھا وہ ڈیش بورڈ وغیرہ صاف کرنے کے لیے تھا اور اتنا بڑا نہیں تھا کہ پٹی باندھنے کے کام آ سکتا۔

میں ادھر ادھر ہاتھ مارنے لگا۔ سیٹ کے نیچے ایک اور کپڑا مل گیا جو خاصا بڑا تھا، میں نے بازو پر بندھی ہوئی پٹی کھول کر وہ گندہ کپڑا کار سے باہر پھینک دیا اور دوسرا کپڑا بازو پر لپیٹنے لگا۔ میں دائیں ہاتھ کی انگلیوں اور دانتوں سے گرہ لگا رہا تھا کہ پیچھے آنے والی ایک کار بڑی تیز رفتاری سے میرے قریب سے گزر گئی، لیکن تقریبا  پچاس گز آگے جا کر وہ کار بریکوں کی تیز چرچراہٹ کی آواز سے رک گئی۔ میں چونک کر اس کی طرف دیکھا، اس کار کے اندر کی بتی جل رہی تھی۔ اس میں دو آدمی نظر آرہے تھے۔ ایک ڈرائیو ، ڈرائیونگ سیٹ پر اور دوسرا اس کے ہاتھ والی سیٹ پروہ دونوں پیچھے مڑ کر دیکھ رہے تھے اور پھر وہ کاربڑی تیزی سے ریورس گیئر میں پیچھے آنے لگی۔

میری چھٹی حس نے فورا ہی خطرے کی گھنٹی بجادی۔ میں کار کا دروازہ کھول کر نیچے اترا اور پہاڑی والےمندر کی طرف دوڑ لگا دی۔ بائیں طرف والی پہاڑی پر کسی قسم کی آبادی نہیں تھی مگر مندر والی پہاڑی پر لا تعداد مکان بھی تھے اور جانے کے لیے تھوڑے تھوڑے فاصلے پر دوسڑکیں تھیں۔ میں جس سڑک پر دوڑ  رہا تھا اس کے دونوں طرف مکان تھے۔

اے رک جاؤ ورنہ گولی مار دوں گا۔

پیچھے سے ایک گونجتی ہوئی آواز سنائی دی۔ میں نے ایک مرتبہ پیچھے مڑ کر دیکھا۔ وہ کار میرے والی کارسے چند گز کے فاصلے پر رک چکی تھی اور دونوں آدمی نیچے اتر آئے تھے انہیں میں سے ایک نے مجھے للکارا تھا۔ میں دوڑتا رہا۔ بتدریج بلندی کی طرف دوڑتے ہوئے میرا سانس پھولنے لگا، لیکن رکنے کا مطلب اپنےآپ کو موت کے حوالے کرنا تھا اس آدمی نے ایک مرتبہ وارننگ دینے کے بعد گولی چلا دی تھی۔ قسمت اچھی تھی گولی میرے سرسے چند انچ کے فاصلے سے گزرگئی میں نے مکانوں کے بیچ ایک تنگ سی گلی میں چھلانگ لگا دی اور دوڑتا چلاگیا میں ایک بار پھر کشادہ گلی میں نکل آیا اور پھر اچانک ہی دائیں طرف سے دوڑتا ہوا ایک آدمی سامنےآگیا۔ اس کے ہاتھ میں ریوالور تھا وہ بھی مجھے اچانک اپنے سامنے دیکھ کر ٹھٹکا۔ میرے اور اس کے درمیان تین چارفٹ کا فاصلہ تھا اس نے ریوالور والا ہاتھ اوپر اٹھایا۔ موت آنکھوں کے سامنے ہو تو بزدل سے بزدل آدمی کے دل میں بھی تھوڑا بہت حوصلہ پیدا ہو جاتا ہے۔

اور میں تو بہت عرصہ سے موت سے پنجہ آزمائی کر رہا تھا۔ اب میں موت سے نہیں ڈرتا تھا اور ویسے بھی میں نے اصول اپنا رکھا تھا کہ خود زندہ رہنا ہے تو اپنے دشمنوں کو ختم کر دو۔

میں اپنی جگہ کھڑے کھڑے طاقتور اسپرنگ کی طرح اچھلا اور اس سے پہلے کہ وہ شخص گولی چلاتا ہیں؟

میں اڑتا ہوا اس شخص کے اوپر گرا اور اسے ساتھ لیتا ہوا ز مین پر ڈھیر ہو گیا۔ ریوالور اس شخص کے ہاتھ سے نکل کر دور جا گرا تھا۔ اس شخص نے سنبھلتے ہی ریوالور کی طرف چھلانگ لگادی ۔ شاید وہ ریوالور ہی کو اپنی زندگی کی ضمانت سمجھتا تھا، لیکن میں نے اسے ریوالور تک پہنچنے کا موقع نہیں دیا۔ میرےپیر کی ٹھو کر کچھ اس زورسے اس کے سر پر لگی کہ وہ بلبلاتا ہوا دور جا گرا اس نے دونوں ہاتھوں سے اپنے سر کو تھاما تھا۔ میں نے دوسری ٹھو کر رسید کر دی۔ یہ ٹھو کر اس کی پسلیوں پر لگی تھی وہ پیچھے الٹ گیا میں نے لپک کر ریوالور  اٹھائی۔

اور گلی میں دوڑ لگا دی میرے پاس اتنا وقت نہیں تھا کہ اس پر ہاتھوں، پیروں کی پریکٹس کرتا رہتا اور پھر یہ اندیشہ بھی کہ اس کا دوسرا ساتھی بھی کسی لمحہ یہاں پہنچ جائے گا اور پھر میرے لیے اپنے آپ کو بچانا مشکل ہو جائے گا۔یہ راستہ ذرا سا گھوم کر مجھے مندر کے دروازے کی طرف لے گیا۔ گلی کے اختتام پر کچھ کھلی جگہ تھی۔ دائیں طرف ایک سنگل سٹوری چھوٹی سی عمارت تھی۔ اس سے آگے ملی ہوئی عمارت دو منزل تھی۔ اس کے ساتھ ہی ملی ہوئی دومنزلی اوپر جانے کے لیے کشادہ سیڑھیاں تھیں جن پر تین کا سائبان سا بنا ہوا تھا

سیڑھیوں کے بائیں طرف ایک اور دیوار سی اٹھی ہوئی تھی جس کے دوسری طرف کھڈ وغیرہ تھے جن میں چند درخت اور جھاڑیوں کی بھر مارتھی اور مندر کی سیڑھیوں پر اکا دکا لوگوں کی آمد ورفت تھی میں سیڑھیوں پر دوڑتا چلا گیا۔

سیڑھیوں کے اختتام پر  بہت بڑا ہال تھا جہاں کچھ لوگ نظر آ رہے  تھے میں دائیں طرف دوڑتا چلا گیا اور پھر ایک جگہ رک کر ادھر ادھردیکھنے لگا.

جیسے کہ میں پہلے بھی بتا چکا ہوں کہ یہ جین مندرساتھ ساتھ جڑی ہوئی کئی عمارتوں پر مشتمل پہاڑی سلسلے پر دور تک پھیلی ہوئی تھیں اور وہ عمارتیں بتدریج بلند ہوتی چلی گئی تھیں۔ باہر سے تو لگتا تھا جیسے ایک دوسرے سے ملی ہوئی سفید رنگ کی وہ عمارتیں الگ الگ ہوں مگر وہ ساری عمارتیں ایک ہی تھیں۔ اندر سے یہ مندر عجیب سی   بھول بھلیوں کا منظر پیش کر رہا تھا کسی اجنبی کے لیے یہ اندازہ لگانا دشوار تھا کہ کون سا راستہ کس طرف جاتا ہے۔ مندر میں اس وقت زیادہ لوگ نہیں تھے، میں وہاں کھڑا ادھر ادھر دیکھتے ہوئے سوچ رہا تھا کہ اس مندر کے دوسری طرف نکلنے کے لیے کوئی نہ کوئی راستہ تو ضرور ہوگا، لیکن میری سمجھ میں نہیں آ رہا تھا کہ مجھے کس طرف جاناچاہئے۔

چند گز دور کھڑا ہوا ایک پجاری میرا حلیہ اور میرے ہاتھ میں ریوالور دیکھ کر چیخ اٹھا۔ او مورکھ ہے ۔

میں اس کی پوری بات نہ سن سکا۔ مندر کے داخلی راستے کی طرف کچھ ہلچل سی محسوس ہوئی۔ ایک عورت کی چیخ سنائی دی۔ اور اس کے ساتھ ہی میں نے آگے کی طرف دوڑ لگا دی۔ داخلی راستے کی طرف سے بھی دوڑتے ہوئے قدموں کی آواز میں سنائی دے رہی تھیں۔